Psalms 107

BUKU KÊTU LEMEŊTEŊŊA

PESALEM 107

Apômtau gêjam aêac sa

1“Anam daŋge êndêŋ Apômtau gebe eŋ ŋac gabêjam,
ênê moasiŋ ênêc teŋgeŋ biŋŋanô.”
2Lau taŋ Apômtau gêjam êsêac kêsi ma kêjaŋgo êsêac su aŋga gêŋwapac naŋ,
sêsôm amboac tonaŋ.
3Lau taŋ eŋ gêjac êsêac sa sêmêŋ aŋga oc kêpi to oc kêsêp ma aŋga musaŋgu-m to mula-m naŋ,
sêsôm amboac tonaŋ.

4Nêŋ lau ŋagêdô seo sêmoa gamêŋ sawa, taŋ intêna masianô naŋ,
ma têtap malac sêŋgôŋŋa teŋ sa atomanô.
5Mo to bu gêjô êsêac
e katuŋ tekweŋ gêbac.
6Gêŋwapac tonaŋ gêgôm êsêac e aweŋ gêjac Anôtô,
tec gêjam êsêac sa aŋga nêŋ ŋandaŋ tau
7ma gêwê êsêac katôgeŋ
e sêô lasê malac teŋ ma sêŋgôŋ.
8Êsêac sênam daŋge êndêŋ Apômtau êtu ênê têtac gêwiŋ teŋgeŋŋa
ma êtu ênê gêŋsêga, taŋ gêgôm gêdêŋ ŋamalac latuŋi naŋŋa,
9gebe eŋ kêlau êsêac, taŋ bu gêjô êsêac naŋ,
ma kêkêŋ gêŋ ŋajam gêôc êsêac, taŋ mo gêjô naŋ tôŋ.

10Nêŋ lau ŋagêdô sêŋgôŋ gêsuŋbôm to ŋakesec,
sêlai êsêac tôŋ ŋa ki sêŋgôŋ jageo
11gebe êsêac sêli aweŋ sa gêdêŋ biŋsu
ma sêbu Lôlôc Ŋatau nê biŋ.
12Koleŋ ŋajaŋa kêkôniŋ êsêac e tekweŋ gêbac.
Êsêac sêu tauŋ jasêc ma nêŋ gêjam-sawaga masi.
13Gêŋwapac tonaŋ gêgôm êsêac e aweŋ gêjac Apômtau,
tec eŋ gêjam êsêac sa aŋga nêŋ ŋandaŋ tau.
14Eŋ gêwê êsêac sêsa aŋga gêsuŋbôm to ŋakesec
ma kêsaic nêŋ kapoacwalô gêŋgic.
15Lau tonaŋ aweŋ êôc Apômtau êtu ênê têtac gêwiŋ teŋgeŋŋa
ma êtu ênê gêŋsêga, taŋ gêgôm gêdêŋ ŋamalac latuŋi naŋŋa,
16gebe eŋ kêtuc katam ki popoc
ma kêtuc balaŋ ki tulu.

17Nêŋ lau ŋagêdô têtap gêmac sa kêtu nêŋ secŋa
ma sêôc ŋandaŋ kêtu nêŋ geoŋa.
18Lau tonaŋ nêŋ ŋalêlôm gedec gêŋ taniŋŋa samob
e sêsa paŋ lêndaŋ sêmac ênduŋa.
19Gêŋwapac tonaŋ gêgôm êsêac ma aweŋ gêjac Apômtau,
tec eŋ gêjam êsêac sa aŋga nêŋ ŋandaŋ tau.
20Eŋ kêsakiŋ nê biŋ gebe êŋgôm êsêac ŋajam êsa
ma kêjaŋgo êsêac su aŋga sê.
21Lau tonaŋ aweŋ êôc Apômtau êtu ênê têtac gêwiŋ teŋgeŋŋa
ma êtu ênê gêŋsêga, taŋ gêgôm gêdêŋ ŋamalac latuŋi naŋŋa.
22Êsêac sêkêŋ da daŋge
ma sêsôm ênê gêŋ, taŋ gêgôm naŋ, lasê êsêp wê têntac ŋajamŋa.
23Nêŋ lau ŋagêdô sêlac sêsa gwêcô sêja
sebe têtulu gêŋ aŋga gwêc sawa.
24Êsêac sêlic gêŋ, taŋ Apômtau gêgôm naŋ,
to ênê gêŋsêga gwêc sawaŋa.
25Gebe eŋ kêjatu e mu gêbuc
ma gêli gwêc ŋadembom kapôêŋ sa.
26Gwêc tau kêsuŋ êsêac sa sêpi e jadêdêŋ undambê, go gêu êsêac sêsêp e gacgeŋ sêsêp gwêclêlôm sêja.
Ma gêgôm êsêac e atêŋ uc-ucgeŋ.
27Êsêac katuŋ kêlau e sêku amboac bu kêjaŋiŋ êsêac
ma nêŋ meloco kêsa samucgeŋ.
28Gêŋwapac tonaŋ gêgôm êsêac e aweŋ gêjac Apômtau,
tec eŋ gêjam êsêac sa aŋga nêŋ ŋandaŋ tau.
29Eŋ gêgôm mutêna kêtu malô
ma kêkêŋ bênôŋ kêsêp
30e êsêac têntac ŋajam kêsa gebe gwêc kêtu malô,
go gêwê êsêac sêsô lêlôm, taŋ sepeŋ naŋ sêja.
31Lau tonaŋ aweŋ êôc Apômtau êtu ênê têtac gêwiŋ teŋgeŋŋa
ma êtu ênê gêŋsêga, taŋ gêgôm gêdêŋ ŋamalac latuŋi naŋŋa.
32Êsêac tetoc eŋ sa aŋga gôlôac ŋalêlôm
ma sêlanem eŋ aŋga laumatanêŋ sêkac sa ŋalêlôm.
33Eŋ gêjam bu ôkwi kêtu gamêŋ sawa
ma bumata kêtu gamêŋ keleŋ.
34Nom ŋalêsi ŋajam kêtu mêcgauc
kêtu lau, taŋ sêŋgôŋ naŋ, nêŋ geoŋa.
35Go gêjam gamêŋ sawa ôkwi kêtu bugêjactoŋ
ma gamêŋ keleŋ kêtu bumata.
36Ma eŋ kêkêŋ gamêŋ tau gêdêŋ lau, taŋ mo gêjô êsêac naŋ sêŋgôŋ,
go sêkwê nêŋ malac sa gebe sêŋgôŋŋa.
37Êsêac sêjam nêŋ kôm to sêsê kôm wainŋa
e gêjam ŋanô gêôc tau tôŋ-tôŋ.
38Eŋ gêjam mec êsêac têtu lau taêsam
ma kêkêŋ nêŋ bôc ŋalêlêma atom.

39Gêdêŋ taŋ gêŋwapac kêkôniŋ êsêac e sêpô lêna tauŋ êndu-êndu
ma nêŋ gêŋ ŋajam kêtaiŋ su e têtu wapi naŋ,
40eŋ kêsêwa majeŋ kêpi kasêga
ma kêkêŋ êsêac seo sêmoa gamêŋ sawa naŋ, intêna masi.
41Mago eŋ gêôc ŋac ŋalêlôm sawa sa aŋga gêŋwapac ŋalêlôm
ma gêjac ênê gôlôac sa têtu kapôêŋ.
42Lau mansaŋ sêlic e têntac ŋajam kêsa
ma gêjac lau secwaga samob nêŋ lênô auc.
43Lau tokauc taêŋ ênam biŋ tonaŋ
ma sêjala Apômtaunê têtac gêwiŋ teŋgeŋŋa ŋanô.